اسراء غريب

اسراء غرَيِّب؛ مش ضحية جديدة

مش جريمة ولا قصة بعيدة.

اسراء بنت غريبة

انولدت أسيرة للعيلة،

ورحلت ذبيحة للعيلة والمجتمع.

اسراء روح صارت بالسماء..

وجسد انصلب من أهل الوفا.

الوفا يعني أخ وأخت وإم وأب

وكلهم غابوا!

الإم مدفونة بالحياة،

والقتلة قتلهم الحيا،

الحيا .. شو هو الحيا؟

إنَّك تشكْ في بنت دمَّك؟!

إنِّك تفضحي بنت عمِّك!

تصفي بنتَك وأُختَك.. دمَّك وهمَّك!

هذا هو الحيا!؟

بالكم ارتاح؟ قلوبكم شفيت من الجراح!

ذاكرتَك المليانة صور اسراء..

رح تغفى وتنسى خلص!

*   *    *

اسراء .. ممسوسة فيها جن.

سناء .. مجنونة بدها ورث.

أحلام.. عذراء قتلها الشك.

وسلام.. قتلها سفاح القربى!

نساء فلسطينيات .. عذارى .. حرّات.. ضحايا

والجاني عايش بينكم.. حر وكأنه أمير!!

إسراء ممسوسة وانت شو!

إنتوا شو!

 مجتمع فيو مس فيو شك فيو جاني حر

هذا المجتمع فيو جن!

قانون عقوبات مش مُقَر..

ووكيل نيابة مش قادر يدافع عن الضحية

وسلطة تقديرية لقاضي ذَّكَر بِتهزَّه كِلمِة "شرف"

هذا نظام فيو جن!

إم وأخت أو بنت عم مش قادرة تحمي إسراء وآية وسناء

نميمة نسوان وحكي الناس بتحرِّك زلام!

فشرتوا مش زلام!

صراخ مريضة في مشفى،

ضرب مريضة في مشفى،

وممرضة بتسجل صوتها!

هذا مشفى فيو جن..

ومِن متى النظام الصحي فيو عدل!

دخيلكم!!!

*        *        *

اسراء خلص

آية وأحلام وسناء خلص.. ومية خلص..

قِصص ياما أبكت وأوجعت بس ما حرّكت.

قِصص ماتت.. اندفنت

وعالاعلام وبين الناس انفضحت.

بيعتقلوا الجناة.. وبعد سنتين بيطلعوا مش جناة

بيعتقلوا الجناة وبعد شهرين بيطلعوا ضحايا

بيطلعوا أبطال وبـ"شرف"!!!

*        *        *

تعالي يا أختي

همي على همك،

دمي على دمك،

ايدي بايدك

تعالي.. تعالي.

تعالي يا بنتي

نفسي أمسح وجعك.. بدموعي

وأحمي جسمك.. بضلوعي

وأضوي روحك.. من ضنا روحي

تعالي أنا مصدقك.. قصة ورح تعدي!

تعالي يا بنتي.. أخوك وأبوك سندك.

ارجعي.. بدونك مافي نور بوصل للسما

ارجعي .. رح ابوس جبينك صبح ومسا

ارجعي بكرة جاي أخوك من السفر..

ياخدك عالحرية

بدنا نزفك للعيشة الهنية،

بدنا .. شو بدنا؟

بدنا اسراء

كلنا اسراء!

كلنا ضحايا .. وأفكارنا سبايا

هيك يا ابن الوطن!

هيك علَّمك الوطن!

بس الدين والاب والأخ ما بيقتل

الوطن ما بيقتل

لا تفكر حالك أكبر من الوطن

انت مش أكبر من الوطن