أصلاً حماس راح تتنازل عن حكم غزّة لانها بتحب الناس ومصالح الناس ومشاعر الناس وقل أعوذ برب الناس . وأصلاً حماس راح تتنازل عن حكم غزة لإنّه الشّتا عَ الأبواب والناس احتمال تنام في بيت أهلها وبيت حماها ونسايبها وحبايبها مش على طول واحتمال بالشارع واحتمال تصير خبيصه وعصف مأكول . وأصلاً أصلاً حماس راح تتنازل عن حكم غزّة كرمال عيون المعبر والمسافرين والعمال والطلاب والطباشير والمدرسين والسمك وسلطان ابراهيم واسماعيل والصيادين والخريجين والإسمنت والحديد وإعادة إعمار الحجر والبشر والرواتب حَقْنَاً للهيموجلوبينْ . وأصلاً حماس راح تتنازل عن حكم غزة كرمال ربنا يفتحها بوجه الغاز والسائقين والموظفين والعاطلين وطلاب توجيهي والماجستير ودكاترة الأنف والأذن والحنجرة والمحامين والسباكين وتبعين الألمنيوم والنجارين والحدادين والكونديشينات والدشات والمشفر و الزينجو والأسبست وأسفل السافلين وأولاد الشوارع والبسطات والشحاتين والصبر من عندك يا رب وعمال النظافة ومستحقات البلديات والمستشفيات والعيانين والتمرجيه والعلاج الطبيعي وقسم الباطنة والنسا وتوليد الطاقة والقلب والشرايين ومتعاطي الزنكس والترامادول ومضاد الحموضة والفوّار والكولا والتابوزين وشركة جوال بنت الإيـر يال والاتصالات طالعينْ واكلينْ نازلينْ واكلينْ ورواتب 2005 وستة وسبعة وعشرين والمسخمطين والسولار والكهربا والبنزين . وأصلاً أصلاً حماس راح تتنازل عن حكم غزّة لإنّه أبو العبد حكى "خدوا الكراسي" . وأصلا أصلا حماس راح تتنازل عن حكم غزة لإنهم لو أخدوا الكراسي راح تقعد عَ الحصيرة . وأصلاً أصلاً حماس راح تتنازل عن حكم غزة لإنه مشروعها مشروع تحرير مش مشروع ضرايب و"هاتْ هاتْ" وشركة مساهمة خصوصية للمقاولاتْ . وأصلاً حماس راح تتنازل عن حكم غزة لإنُّه شعبيتها هيكْ هيكْ فوقْ فوقْ . وأصلاً أصلاً حماس راح تتنازل عن حكم غزة لإنه الاستثمار بقضايا القدس والعودة والتحرير أهم وأكبر من الاستثمار بغزّة الرمال . وأصلاً حماس راح تتنازل عن حكم غزة لأنها تؤمن بالوحدة وبالشراكة مع الآخر وبمبدأ المواطنة ومع التعددية السياسية والفكرية ومبدأ سيادة القانون والانتخابات وتداول السلطة وتنبذ الخلاف والفئوية والعنصرية والإقصاء ولا تسعى لأن تكون بديل لمنظمة التحرير . وأصلاً أصلاً حماس راح تتنازل عن حكم غزة لإنها بتراعي مشاعر الكائنات الحيّة بغزة وعارفه إنُّه نفسيّتهُم تعبتْ كتير ونِفسْهُمْ يآخدوا نَفَسْ ويشُمّوا الهوا بدال ريحة عرق المجاري والصراف الآلي والصرف الصحي بالبلد وبالبحر وفي طوابير السيارات والكارات والأونروا والأوكسفام والكوبونات والبطاقات والقروض والمساعدات والانجيؤوز والهبرات والمستشفيات والمراجعين والمتضررين و مدارس الإيواء وإلى آخره من القرف والتفاصيل . وأصلاً أصلاً أصلاً حماس راح تتنازل عن حكم غزة لإنُّه لو فيها خير ما رماها الطير ومحدّش يحكي " في المشمش" لإنه بنفع "في السنطروزة" ..!!
سبتمبر/2014
غزة-فلسطين المحتلة
جميع الحقوق محفوظة لـ أمد للاعلام © 2007 - 2026
