تاريخ النشر: 2019-03-20 | 09:06
تاريخ النشر: 2019-03-20 | 09:06
أنا المقاومة
انا صاروخ اذا طلع لفوق .. صعب إنه ينزل،
أنا كلمة لأ للمحتل ما بتركع،
أنا منارة بيطلع منها نور ما بيخفت
وصوت ما بيسكت
أنا! أنا مين؟
أنا القابع في الأسر..
راح العمر راح الدفا وكله فدا فلسطين..
أنا القابع عشانها سنين ..
والسنين لأجلها متل الناي الحزين!
***
أنا وأخوي .. أنا وأختي
في الضفة وغزة وال48
بدونا مافي وطن
بدونا مافي حلم.
المقاومة وطن..
والوطن هو المقاومة
***
طب انتِ مين؟ وإنتَ مين؟
انت الي قتلت أخوك،
انت إلي كسرت ايدين هذا الطفل الصغير
انت الي فتحت الباب ع مرأة فلسطينية
وكسرت الّي فوقها وتحتها!
انت مين؟
انت المقاومة؟
لا انت حماس وبس!
حركة حاملة راية مش رايتها،
وعلم مش علم فلسطين،
شعارها غرّر واكذب..
مش مهم!
مدام الكرسي تحتها،
وابن المسؤول فوقها
مدام الفلوس غايتها،
والضرائب بتثبتها،
والأسعار الغالية بتعززها..
مش مهم!
يا ناس #بدنا_نعيش
معقول المقاومة تقَتِّلنا!
#بدنا_نعيش.. بدنا نعيش
بدنا نعيش يا حماس ويا فتح
يا أحزاب ويا بلد.
***
مافي لقمة في بيتي،
مافي عُرس بأحلامي
مافي وظيفة..
مافي مكان حتى الحمار رح يصير حلم
بدنا نعيش؛
***
هاي قصة أهل غزة
مش أجندة سين او صاد!
تحت حُكم حماس ..
عم تضيع الكرامة
وعم يهربوا الناس.
ساعدونا لحتى نعيش..
***
واااال صارت العيشة هدف..
صارت العيشة حلم..
والمقاومة ظُلُم؛
لما "المقاومة" تقمع..
بتصير ظلم
لما المقاومة تلبس بدلة..
بتصير حلم بعيييد
لما المقاومة تخدع وتكذب
وتسجن وتخطف
بتصير .. شو بدها تصير يعني!
يا عمي نحن شو قلنا غير إنه بدنا نعيش!
انا المقاومة؛
بدنا نعيش.. يا نااس
بدنا نعيش يا الله.. بدنا نعيش!!!
جميع الحقوق محفوظة لـ أمد للاعلام © 2007 - 2026
