الفاتحة عَ البلد !!

المفروض إنُّه الحكومة "حكومة توافق" يعني زي الشيخ في المحكمة لما يسأل موافقة يا بنتي تتزوجي .. البنت يا بتخجل وبتصير خدودها حمرة يا بتضحك ضحكة هبلة يا بتحكي موافقة يا بتصير تعيّط ..!! طيّب نرجع لحكومة التوافق يعني حماس موافقة عليها وفتح موافقة عليها والمفروض الفصائل موافقة (يا ويلي عليها الفصائل إيش طالع بإيدها غير أصابيع !!) والمفروض إنّه هناك مستحقات قديمة لموظفي غزة في ذمة "حكومة حماس" السابقة ، فالمفروض حماس تقوم بجدولة المستحقات وتبدأ بالصرف مطلع كل شهر مبلغ مقطوع منها بحيث يتمكن الموظف بالبلدي "يمشّي حاله" وبالتوازي تقوم اللجنة القانونية الادارية التابعة لحكومة التوافق بعملها والانتهاء منه في سقف ثلاثة أشهر تكون خلالها عودة تدريجية للموظفين القدامى علماً بإنُّه أغلبهم أصلاً عائدين وموجودين على رأس عملهم (صحة وتعليم وشؤون مدنية وخلافه) ومع انتهاء فترة الثلاثة أشهر يكون جميع الموظفين السابقين واللاحقيين مدرجين على سلم رواتب السلطة ولا تعايرني ولا أعايرك أوسلو طايلني وطايلكْ . باختصار وبلا طول سيرة القصة مش قصّة رواتب ودبّانة القصة إنُّه لسّه القلوب ورمانه .... وجذر مشاكلنا بالأصل سياسي ومصالح حزبية واقليمية وأجندات خاصة ... في اللحظة اللي بنصير فيها محترمين وقلبنا عَ معاليق وكبدة بعض وعَ البلد وع مستقبل اولادنا كلشي بنحل ... فش مشكلة ملهاش حل حتى البُقع الوسخة بتطلع يا بالايريل يا برسيل .. حلّوها يا أولاد القمحة مضلّش وَسَع عَ الاحبال ننشر غسيلنا الوسخ .. ومضلّش ميّه ولا كهربا ولا غاز ولا شمينتو ولا علاج بالداخل ولا معبر ولا سفر ولا أمل ولا حتى رواتب للمتقاعدين يلاّ تزعلش يا خال .... استحيـوا واعتدلوا أثابنا الله وإياكم وأنتَ يا مؤذن أقم الصلاة ... الفاتحة عَ البلد !!