تاريخ النشر: 2018-02-26 | 16:13
تاريخ النشر: 2018-02-26 | 16:13
أنا آسف يا بلدنا ..
عَ اللي عملوه ولادنا
أنا آسف يا مدينتي
آسف منك ليكي انتي
أنا آسف يا حبيبتي ..
يوم ما انتِ انظلمتي !!
***
آسف يوم ما تقاتلنا
آسف يوم ما انقسمنا
آسف يوم ما الدم سال
آسف لما الشيخ قال لك
اقتل أخوك ده حلال
أصلُه مش من أهلك !!
***
أنا آسف يا ريسنا ...
يوم ما تظاهرت ضدك
آسف يا حكومتي
يوم ما ظلمتك انتِ
آسف للغفير وللوزير
آسف للصُغير والكبير !!
***
آسف عَ اللي عملته
من يوم ما انولدت
وانتَ آسف برضُه..
مش كده ولا لأ ؟؟
آسف لما قلت آه
آسف لما قلت لأ !!
***
آسف لما قلت أكذب
أسف لما أقول الحق
آسف لما سرقتِك
مِش كده ولا لأ ؟؟
آسف لما تركتِك
آسف لما قلت راجع !!
***
آسف على كل حاجة
عملتها ليكي وفيكي
من يوم ما انخلقت
أنا آسف يا بلد ...
آسف لكل أم لكل أب
آسف للبُنية والولد !!
***
آسف يوم ما هجرتك
آسف لما قلت هارجع
آسف لما قلت نادم
آسف لما كنت نايم
آسف على حلم ضايع
آسف لكل شاب صايع !!
***
آسف لكل طفل وطفلة
من يوم ما كان في اللفة
آسف لما رفعت صوتي
آسف لما صرخت ..
أنا آسف لما هتفت ..
في يوم مظاهرة !!
***
ومرة ثانية آسف يا بلدنا
ومرة ثالثة أسف يا ولادنا
آسف لما فرحنا بيكوا
في يوم للدنيا جيتوا
وقلنا ليكوا دي بلدكوا
آسف على كذبتنا ليكوا !!
***
آسف لما ميزان العدل غاب
آسف لما سيف الحق مال
آسف لما السفيه صال وجال
آسف لما العبد على سيده بال
آسف ع الجواب وع السؤال
آسف يا بلدنا على آدي حال !!
***
آسف يا غزتنا يا رمز عزتنا
آسف من حُكم ظالم
حَكم بالسيف لاجل كرسي
يا بلدنا مش حقولك انسي
آسف يا شعب صابر
آسف عن كل كلمة صبر
قالها لك كاتب وشاعر !!
جميع الحقوق محفوظة لـ أمد للاعلام © 2007 - 2026
