أنا مِشْ كاتب (أكرم الصوراني )

أنا مِشْ ساخر

أنا سنفور مزروع في سنافر

أنا مش كاتب

أنا مش ساخر

ولا مسؤول ولا قائد فاخر

أنا مش كاتب ..

وكلّ ما قَلَمي بيكتُب كلمة بَروح وأنا شاطب

حالي حكالي ماتكتبهاش

ماتضيعناش

ماتبهدلناش

ماتورطناش

امي وأختي حكولي بالله عليك ماتخوفناش

ومرتي أماني

إتنادي إتهاتي وكل أصحابي

والله أكرم عَ الفاضي

حتى أمونة أخت أماني

وأنا بَكَلِّمْ في حماتي .. ست أولادي

سَرَقَت سماعة التلفون

مش عارف طلعت من وين

حكتلي بسلِّم عليك محمود وبحكيلك أُسكُت يا حزين

والله ما تستحمل كفّين

والله يا عالم أنا ساكت

والله يا عالم مش كاتب

حَتعلَّم الرّسم كويس

حارسُم مثلاً معبر

حارسُم حاجز

حارسم جدار

حارسم حوار

حارسم حصار

حارسم مطار

حارسم مينا

حارسُم سفينة

ولاّ بلاش نعوم في بحر السياسة

خلينا عَ البَر

حارسم سيارة بتمشي عَ الزيت

و أطيّر طيارة وأرخي الخيط

وآكُل واشرَب وألعب طرنيب

وأبيع مُغّيط

وأمشي الحيط الحيط الحيط

أو جُوّا الحيط

فُرصة أتعرَّف عَ النملة

أشكيلها همّي

وأشكيلها صوت الصراصير

وبالمرّة أقترح عليها إنْفوكِس سوا

يعني نعمل فوكَس جروب

أو نَدوَة

غَدوَة

ورشة عَمَل

ورشة هَبَل

عن حقوق النمل

والبيات الشتوي ومستقبل الخُرُم

ورشة تكون زخمة ويكون فيها زَفَر

بتمويل فرنسي اوروبي طلياني أمريكاني

انناقش فيها لو سمحت هادا مكانك ولا مكاني

إنتَ تحكيش

إنتَ إحكي تاني

ونحترم الوقت يا ريت

يعني وقت النقاش نقاش

ووقت الغدا غدا

ونحترم النظام

كُلّه يصُف طابور

يصُف عَ الدّور

الأستاذ وصل

المسؤول وَصَل

النظام وَصَل

البوفيه وَصَل

باب البوفيه مفتوح وباب الحوار إنقَفَلْ

وعلى رأي المثل "الباب اللي بجيك منُّه الريح سدُّه واستريح"

وعلى سيرة الابواب

ومن باب البريستيج

أعطيت النملة كرتي

عليه اسمي وعنواني وتلفوني وهَبَلي وعَجَري وبَجَري

ورقم جوالي

دَردَشنا سوا

أكلنا هَوَا

وإشبعنا كلام

وغنّينا أغاني

بلادُ العُربِ نملاتي

وكلُّ النَّملِ اخواتي

وفيروز وأنا وشادي

وأنا عادي

أنا مش كاتب

أنا شاعر إنّي بهلوس

إنّي بَهاتي

إنّي مُجرد بني آدم بيفَضفِضْ عادي

وهادي كانت مُجرّد مِشْ قصيدة !!