ايش اكتب...؟!!

والوضع متنيل بستين نيلة ومتكركب وغزة كل مابها رايحة من جهنم لجهنم وريحة المجاري من ورا بتهبهب!! مابنا تصريحات الاعمار و التسكين وابرالمورفين من الحمد الله وعباس..وما بنا تصريحات المقاومة لم ولن ..وبلاغات التحرير من نقطة الصفر من 8سنين من قادة الاصلاح والتغيير في حماس ..!!

مش ح اطول عليكم ...عارفكم كرهانين كثر الحكي زي كرهكم لصور وتصريحات ومناكفات الاخوان الغربان ..الناطقين الرداحين باسم حماس وفتح في اعلام اخر الزمان ..!!

حتكلم بالعامية المجلوطة..كلام الحارة والزقاق والشارع ..بدون فصحى وتزويق وترقيق تلفزيون واذاعة ...بعد ما افطرت فول وراسين بصل وشربت شاي اخضر في خزاعة ...وبدون مونتاج وبيني وبين اليهود.. خمسين متر وسياج..!!

الله اكبر على حالنا .. اتدمرنا وانخربت ديارنا واحنا بنقول انتصرنا...يعني كمان انتصارمش حنلاقى حد يقرا علينا الفاتحة..!! صدقوني انا مابكره حد ..بس الظاهر في ناس بتكره نفسها وبتكرهنا... بتضحك ع حالها وعلينا ليل نهار وبيمين وشمال لاعنة ابونا في عزا امنا .. بتبلنا كل صبح بالهم والظلم والحزن وفي المسا بتطحنا وتعصرنا.. لحد من كثرشرب الخوازيق ماسكرنا...!!

فتح ام الفصائل هيهات ..صارت من زمان فتحات ..فتح عباس وفتح دحلان وفتح علبة سردين وفتح دكاكين وسوبرماركتات!! ان كان اولاد ابو واحد وام واحدة هيك عاملين ..مفيش في الدنيا خواص قلوبهم على بعض نار مفرقين مش موحدين...يبقى ايش الفايدة في الباقيين ؟!! والحمد لله حكومة الحمد لله للمستنكفين واقف حالها من سنة...ليش ..؟ عارفين ..ومش عارفين..!!

الشعبية ام الرفاق..حبيبتي لما تطل وين ووين..صارت تشتغل مختار حارة..!!وبتتوسط بين الجهتين..والجهاد بنت التقوى والايمان بتتحول شوي شوي بامرايران لنسخة طبق الاصل من حماس بس صناعة تايوان..!!

وحماس ام النفير وملكة المقاومة..بتلعب لعبة فار وقط.. بتقاوم أي حل وبتتشرط ع رام الله ياتحط ياتنط..واقفة في الزور..وقاعدة في نص الحصيرة من سنين ..الله وكيلك من يوم مانتخبناها .ماشفنا الخير وياها..هي الحاكم الفعلي في غزة العزة.. ومايمشي امر من غير شورها ولا الو طعم ولالزة ..وسيبك من اللي ساب الحكومة ولسه مقرقط في الحكم وماسك بالتيلة.. وبيغني له (انت عمري ) و(امل حياتي)و(حياتي بعدك مستحيلة)..!!

حماس عنيدة وحتظل عنيدة ولو صارت ع الحديدة ولوالشعب كله مات..حتحكم المقابر والمنابروالمعابر بسم الله كابرا عن كابر..وعنزة ولو طارت..!! من حقها تعمل تكتيكات.وتهدئات مباركات ومن تحت لتحت دردشات زي ماغيرها بيعمل تنسيقات محرمات مفاوضات ملعونات..!!

يارب.. كفاية نكد ..يوم نصحى على احضان الاحمد وابو مرزوق وسمك الشاطئ ومباوسات ونكت وابتسامات امام الكاميرات !! ويوم نصحى على تصريحات زي الزفت ولعب اولاد زغار ومناكفات ..!!

احنا ياناس ..في الواقع مفعول فينا وملعون اهالينا بين طاحونة عباس وحماس والمفروض .يحلوا عنا نص نهار ويعطونا اجازة ولوناكل حشيش.!! ياناس انهرينا ومنهم انقهرنا وانفرينا .بيكفي والله الرحمة حلوة..بدنا نعيش..!!

غزة يا حضرات ..تعيشوا انتو.... وملهاش عزا....توكلت بعد عمر مرير من شقا ونضال...ومرض سياسي عضال...عاشت مهانة من احتلال لاحتلال..!!من تركي لانجليزي لمصري لاسرائيلي لفتحاوي لحمساوي وربنا اعلم ايش بالقدر ناوي...علي عليها الضغط والسكر منا وفقعت مرارتها من فعايلنا.. وترملت مرات في الانتفاضات والحصارات والغزوات..!! اولادها واحفادها.دخلوها الانعاش...لعل وعسى تودع بخطأ طبي زي نعمة الجملة و يلاقوا في بطنها كيسين قطن مع شاش..؟ او تسمع خبرعاجل عن ضريبة التكافل على شم الهوا ..والمشي في الشوارع... بعد ماراح الموز والتفاح...وياخوفي ع الشمام والبطيخ... وع العنب اللي جاي والظاهر مش حيسلم منها حتى المخلل والفسيخ....!!

واللحمة.... لحمة يادنيا لحمة...لحمة ولاعادش رحمة من 40ش للكيلو الى 55ش في ساعة واحدة. وطبعا حيغلا الجاج...باحتجاج او من غير احتجاج. هذا هو التثبيت والتمكين والفرج المبين والله يعوض على كل المحرومين!!

يارب العالمين.. بلاها اللحمة..خلينا نباتيين في الدنيا وعوضنا باللحمة الضاني في الجنة..!! مال الفول والحمص والعدس...؟ احسن من الخبز حاف و الفلس..!!

حتى البلديات الكالحة بشارة علينا فرضت 10شواكل ضريبة (منازل) من باب التهابل وكله على وزن التكافل على كل فاتورة ميه مالحة..!! ووين ووين لما تيجينا الميه...في عهد عباس وهنية.. والحمد لله صلينا تيمم. هذا غيرهم الكهربا والبنزين..وشركة جوال اللي زي المنشار.. يارب ياستار..!!

كل يوم بنسمع عن ضريبة شكل اشي ضريبة مكوس واشي ضريبة نفوس واشي ضريبة متعوس واشي ضريبة لم فلوس ..!!وبكرة لو عشنا حنسمع عن ضريبة شم النفس والقعدة تحت الحيطان من الفلس وضريبة ع السلام والكلام..وحسبنا ا لله ونعم الوكيل ع اولاد الحرام..!!

اصلا كلمة ضريبة.. مستفزة للناس..كلمة شرانية عدوانية لله فلله من حد ضريبة الاحتلال المضافة لحد ضريبة اليوم ع الخيار والجوافة..!! ومهما سموها ودلعوها وزوقوها بالتكافل بتظل بلوة ومصيبة وفي زمنها عجيبة..!! بعديت تكافل مين مع مين؟ موظفين الانقسام مع الفقرا الملطمين؟!! هذا زي العميان اللي بيشحد من طفرانين !!

موظفين الانقسام مالهم ذنب وراهم عيال وحقهم يقبضوا زي المستنكفين.. بس مش ع كتاف الغلابا المسخمين!!

اعتبروني..انا جاهل ابن جاهل نوروني يامتعلمين..فهموني انتو قلتو سبنا الحكومة لعيون المصالحة وشعبنا..مشكورين.. طيب باي صفة واي حق ياحبايب بتفرضوا علينا الضرايب.. بتشريعي نص كم حاضر وغايب؟!! واللا بالداخلية والامن في زمن حواش على زرايب؟!!

الافضل والاشرف تعملوا انقلاب ثاني..انقسام ثاني وتعلنوا غزة امارة ..مملكة..جمهورية وان شاء الله تخلوها كباب..اوهباب بدل ماتحكموها من ورا الباب..!!

غزة يا حضرات ... احلى مافيها الامن....امن وامان في كل مكان ...بس فرقعة هناك ..وقنبلة هان ..وحواجز ع الطريق.. شو؟ ايش في..؟ بيقولوا بيدوروا على مدعشش ..او ترملة ودخان ..!! ومادام الوزير بلا وزارة يقول عندنا امان فصدقوه ووحدوا الله...ولو رايتم عكس مايراه...فما يعلمه الوزراء لا يعلمه الاشقياء.!!

غزة ياحضرات...ملكة النحس بلا منازع.. وعدوها في التسعينات تصير سنغافورة...غليت البندورة ووعدوها بالاصلاح والتغيير..ورغم كل التمكين والتكبير وقعنا في البير..وصرنا من تأخيرلتاخير.. اتدمرنا واتحيرنا ..

غلي كل شيء مسدود..والحصار مشدود..والمخابزعلى الله لدينها تعود..!! التجار قرفانين والناس هلكانين.. الا ناس معينين ع كتافنا ماكلين شاربين....!! ومش حاسين بهمنا وغمنا...واللي حاكم امنا هو عمنا ...ومالنا غير الله يهونها علينا ويعين ...!!