باللهجة الفلسطينية ..

حكي حيزعل ناس كثير !!؟؟ واللي حيزعل بيكون مشروع حرامي و يقلب من هون ... ..
أنا بدي قمباز وحطة ولهجة ولون وطعم ونكهة ابن بلد ....
مش تعليب مصانع الآخرين .. اشي تركي واشي اماراتي واشي إسرائ لي واشي قطري واشي ايراني واشي مجلي واشي غزاوي واشي خليلي !!؟؟
لو صارت انتخابات رئاسية في فلسطين .. ؟
أنا مش لاقي في الموجودين حدا مستاهل أعطيه صوتي او حتى أصل الصندوق !!؟؟
بعد كوفية ابو عمار ...
مش شايف فلسطيني واحد يستحق انتخابه ...
عمري ما حسيت إن ابو عمار وابو جهاد وابو اياد انهم فتحاوية ولاجورج جبهاوي ولا المطران كبوتشي مسيحي وهم اللي شعللوها وولعوها ثورة ...
و شفت عبد الناصر فلسطيني وصدام فلسطيني وهواري بومدين فلسطيني وناصر وابوه فهد الصباح فلسطيني وكاسترو فلسطيني وسمير قنطار فلسطيني وكمال جنبلاط فلسطيني ومانديلا فلسطيني والملك فيصل فلسطيني وعلي صالح فلسطيني وشافيز فلسطيني وشيراك فلسطيني ....
طيب يا أوادم ...
انا بعرف إن درويش وسميح وغسان وزياد وأبو سلمى ودحبور وادوارد سعيد وأبو لغد وهاني الحسن وأبو علي مصطفى
فلسطينية ... بس والله ما بعرف من أي خربة أو عزبة
أو قرية او مدينة في فلسطين ...
طيب اللي فيكم بيعرف احمد الشقيري ويحيى حمودة والزير وجمجوم وحجازي وحواتمة وجبريل وزهير والأمير الأحمر وأبو العباس وغوشة وشحادة والنجاب وصايل وأبو الهول والطيب عبد الرحيم وليلى خالد
من أي خربة في فلسطين
يحكي ....
هلقيت ...
كل الكلمنجية اللي في المشهد بيشحنوا رصيدهم من برا البلد ...
واحنا عارفين كل واحد فيهم من وين واسمه رباعي والطعمة اللي اكل فيها وايش كان أبوه يشتغل واسم جوز بنته ومرته واولاده ايش بيبيعوا وخاله حتى ايش كان لقبيته في حارته ...
اقلك يا خليل انا بعرف ايش كان بيشتغل هو وابوه ..واكم طز كان بياخذ في الشهر.. و قديش لفلف ضاني امبارح من لحم الأضاحي تبع الغلابا والمسخمين ...
شوفوا ....
أنا بفهم إن يكون للنادي مشجعين وجمهور ...
بس حرامية ولصوص ولهم قواعد جماهيرية وأنصار ومشجعين وحبة ارزقية...
والله هيك كثير !!
ملاحظة ....
لست غاضبا من لصوص لحوم الأضاحي ...فهي في السنة مرة ...
انتباهة ..
بدناش إياكم بس بدنا تنقلعوا .. وفي رواية تغوروا ... أو تتجهنموا

لمتابعة آخر المستجدات .. انضم الآن إلى قناة "أمد للإعلام" على تليغرام .. اضغط هنا