بلد عايشة ع نكشة: طاسة الضمان (2)!

الفيديو الماضي حكيت فيه عن المفاهيم الغلط الي وصلت للناس عن قانون الضمان، من مين وليش: الجواب عندكم، اشي بيتعلق بالحكومة واشي بمؤسسة الضمان واشي بيتعلق بالبعض هنا وهناك..

أما الحراك الشغال ضد الضمان –والحراك كلمة في القاموس الفلسطيني باتت تسبب حساسية لعدد من المسؤولين- المهم إنهم بيتظاهروا: لاسقاط القانون وبالمرة الحكومة (طالعين طالعين!)!! لا معلش طولوا بالكم: يا هاي يا هاي؟ ركزوا في وحدة منهم، يعني الحكومة برضو عمرها فوق الخمس سنين، شعبطت وتسلّقت وتمركزت وقعدت واسترخت وبدكم تطيروها بمسيرات الضمان، مش زابطة ورح تخرب عليكم موضوع الضمان كله! (مخمخوا وفكروا)

بعدين ليش زعلانين؟ ما الحكومة قالت رح تعدله زي ما عدلت قانون الجرائم الإلكترونية بتخبيصاته، آه هي هيك بتحب تطلع قوانين بعدين بترجع في كلامها وتعدل.. هيك موديلها!!! زي موديلكم: مش عدلتوا 18 مطلب في 2016، ورجعتوا في كلامكم في 2018 وصرتوا تتفتقوا من جديد (تحملوا)

تعالوا تا أقلكم: قانون الضمان الأردني قعد في خلاط التعديلات من 80 لهلكيت، وتطبق ع مراحل بدءً بالشركات الكبيرة بعدين الحكومية غير المشمولة بالتقاعد والبلديات... نحن جايين نطبقه كوشة وحدة (فصاحة)، وبدنا قانون كامل مكمل، بزبطش يا عمي، واعرفوا إنه الكل مع الموظف والعامل وبدهم يعدلوا يعني بدهم يعدلوا. بس ركزولي في هالشغلتين الي اذا ما انعدلوا كل تعديلاتكم فراطة:

الأولى: الاستقلالية: وينها؟ مؤسسة الضمان مستقلة حسب القانون، وبنفعش رئيس مجلس ادارتها يكون وزير العمل وكمان أربعة من الحكومة –تخنتوها-، بعدين شو بيفرق المجلس عن اللجنة المركزية لأي فصيل، بدكم تفهموني انه ممثل العمال وصاحب العمل أبو الملايين صوّت على إنه التأمين الصحي يبدأ من الحكومة (كشيلكم قطاع خاص وجاه الناس جاي وبالآخر بدكم تصفوا عالدور عند أميرة الهندي تترجوها ع تحويلة لمشفى خاص) عأساس مشافي الحكومة مكفية وموفية مرضاها! (يلا ميتين ميتين هو انتوا احسن من موظفي الحكومة!) بتقول مؤسسة الضمان انها بدها توقع اتفاقيات مع مشافي تانية خاصة؟ (طب ليش بتوقعوا اتفاقيات بدل ما تطرحوا مناقصات لأفضل الخدمات الصحية للمليون عامل وموظف؟ ليش؟)

وين الاستقلالية اذا الحوار مع العمال والحملات الوطنية لتعديل القانون عم تقوده الحكومة مش المؤسسة؟ وين دورها مؤسسة الضمان؟

والشغلة الثانية: وين الشفافية في مؤسسة الضمان؟ خرفوا المليون مسخمط الي بدو يسجل عندكم شو وكيف بتشتغلوا؟ وين اللوائح التنفيذية للقانون؟ معقول كنتوا تكشوا ذبان خلال السنتين؟ يعني مثلاً مناقصة الحافظ الأمين وهي المؤسسة المالية المسؤولة عن أموال المسجلين في الضمان، ليش رسيت ع أحد البنوك؟ الي كان يشتغل فيها وزير العمل الحالي؟ طب وين المناقصة؟ هو في مناقصة؟ والله فتحت ع موقع مؤسسة الضمان لقيت بس مناقصات لتوريد اثاث وكمبيوترات وعطاء لتوفير المي السخنة؟؟

وفوق كل هاد بطلع وزير العمل بتصريح انه بدو يدمج صناديق الضمان بالتقاعد؟ (شكله سامع أغنية فارس كرم: الليلة بدنا نولعها!) وبدكم بعد هالحكي الملغمط الناس تسكت! ليش هو صندوق التقاعد عم تسدد الحكومة فيه التزاماتها؟ الموظف الحكومي عم يسدد، بس الحكومة عليها 2 مليار (ولا شيء!)

علي الضمان فيه ناس لازم تسكت!! وبدنا رئيس مجلس ادارة مستقل، ومجلس ادارة زكورت بيقدر يدافع عن العمال واصحاب العمل... أو ضبوا هالطابق كله!