بلد عايشة ع نكشة: طُقوا موتوا!!

نازلين أكل و"لس" في هالكستنة طول الشتا، بس حدا عارف شو فوائدها؟ طبعاً إذا سألنا "جوجل" رح يحكيلنا إنها "بتمنع السرطان وتعيد شباب البشرة وتحمي من السكري ....." حيلك حيلك، شو شايفنا مَخوَتِة! إلا إزا نحن المرض بحاله! والصراحة اه نحن عنا مرضين: مرض الزفة عالطالع وعالنازل، مش بس هيك نحن تخصص افراح ودايما رافعين شعار هيفاء وهبي "بدي عيش". والتاني: الطَفِس بردو عالطالع والنازل.
ويا فرحة ما تمّت!! صدر قرار مجلس الأمن 2334 من هون واشتغلوا فينا "المعارضة" –مش القصد اليسار حاشاهم هذول هاديين من زمان-، القصد "عصفور" و"دحلان"؛ صُحبِة القلم من جهة والكاريزما والملايين من جهة تانية، الأول خلطة عجيبة (طبق مفاوضات أوسلو ع رشة كامب ديفد وهلء متقاعد قاعد شعاره: التار ولا العار!!) والتاني فتحاوي مُعارِض، وفيه تالت معهم اسمه مش "رشيد".. (وهدا خليهم يشبعوا فيه)!
"عصفور" الي قاعِدِلنا عالنقرة، ما سمعنا صوته لما دحلان "ابو الوطنية" وحماس "حامية الحِمى" اتفقوا ع جلسة التشريعي، اجتمعوا عشان حالهم، ول يا "أبو فادي" عُمرينها الحصانة! صحيح حاولت تعدِّلها وتفرح معنا شوي ع قرار مجلس الأمن، ومسكت العصاي من النص، بتصريح حنون مع شوية تحفظات (بريء!!!).. بس فلتِت ماكنتك الاعلامية علينا نحن المسخمطين... (طبعا طبعا قلبك ما بطاوعك تزقّف للرئيس)! وهيك أجا "عصفور" إلي طلع مش "حسن" ضد القرار بالمطلق، وطلّع كُل غِلّه فيه وقال انه: القرار أسقط اتفاقية جنيف، مع إنه أول كلمة بالقرار: جنيف. (شكله الكره أعمى)... فعلا ع رأي المتل: عصفور بالايد أحسن من "عصفور" عالشجرة! ومافي طير علّا كتير إلا ووقع عالسريع (بس الصراحة هالعصفور طوّل) ولكم إزا حماس الي ما بتضحك للرغيف السخن رحّبت بالتصويت ضد الاستيطان!
والي بتقولوا عنه صاحبكم "السيسي" أبو فلاتر الصدق والأمانة والحق" سحب القرار، بجوز الفلاتر طلعت مخزوقة( http://cutt.us/FPpUO))..لحلِحوها شوي وافرحوا يا جماعة، لا تخلّوا قلبكم اسود.. لا تخلّوا ابو فروة يحسد أبو جاعد!
وعشان ما تقولوا إني بسحّج، الحق إنه هاي المعارضة يا سيدي الرئيس هي الي بتحمينا من السكري والبدانة، خليهم يقولوا، وخلينا نسمع، والعيار الي ما بصيب بدوش، وبدنا نشوف مين رح يدوشنا أكتر، المعارضة والا انجازاتنا "التاريخية" (شد حيلك سيادة الرئيس)!!!! وطبعاً انتوا عارفين إنه نحن تخصص انجازات خارجية... بس بدنا حدا تخصص انجازات داخلية، حدا ما يطقع لهالشعب!!
هاي هي قدراتنا؛ قرارات هوائية أحسن من الجعجعة عالفاضي والملان متلكم، وما تخافوا علينا نحن منعرف القرارات الأممية الكتيرة الي ضد الاستيطان واسرائيل.. وما تحقق شيء منها... بس وين مشكلتكم؟ خلّونا ندخل غينيس بالقرارات، بلكي استحوا ووقّفوا الاستيطان.. (ساعتها بكون جد في حمار ميت ع رأي ستي!)
بس يا معارضة.. هلووو اصحوا... شفناكم هون وشفناكم هناك وشفناكم فوق وشفناكم تحت! ما كتير فرقت! شو الحل السياسي السحري الي عندكم؟ والا بس بِدكُمش زفة دولية ولا عُرس فلسطيني؟ دخليكم ارقصوا معنا شوي.... منضل ولاد بلد، وابقوا اتحفونا يا فلتات!!! وهاي وعد مني نرقص "بتوازن" ع أغنية جنوا ونطوا.. (أغنية جنوا ونطوا:

http://cutt.us/3Sidb