بلد عايشة ع نكشة: مش خالصة!

قال كل ما تسأل حدا كيفك؟ بحكيلك خالصة..طب شو هي! يعني انت عارف وبدكش تحكي! ولكم هو في اشي  راضي يِخلص! نحن بس الي رح نخلص؛ من قصة لقصة من قانون مشقلب للتاني، ومن تسريب للتاني، وجلسات واجتماعات ما بتخلص -علنية بس بدون صوت- وملفات كبيرة واقفة عالموقف.. بس فش باصات! طيب والنظام السياسي ما بيخلص!! (سؤال بريء مش راضي يخلص).

والقضايا الي مش راضية تخلص صغيرة وكبيرة؟ ولكم حتى الاسكان صار بدو مُخلّص عشان يخلص مش مقاول؟ اه هيك صار باسكان المعلمين في نابلس، خمس معلمين اسسوه في 1997، ولليوم الاسكان موجود ومش موجود، 175 وحدة سكنية؛ بيوت وحجارة و4 عائلات ساكنة بدون كهرباء ولا ماء، يخرب فنها من بلد، عأساس سياستنا تشجيع الاستيطان الفلسطيني (والله واهلين استيطان لناس وناس!!) وجيش الاحتلال عم يسرح ويدرب في الاسكان (طبعا ما هو منطقة مقطوعة ومالهاش اصحاب!!)

صارله الاسكان مبني 15 سنة وفش خدمات عشان هيك فش سكان! وهادا الحكي ما لازم يزعل أصحاب الاسكان الافتراضيين!!: لازم يصيروا 25 سنة عشان نعملهم يوبيل فضي ونركبلهم الكهرباء والماء؟ وتنسوش إنه غزة كلها عايشة ع قلة الكهرباء (ما عدا الحماميس) يعني انتوا أحسن!

ولكم 15 سنة.. استحوا يا مسؤولين، وصار في الاسكان 14 حالة وفاة، غير الي تقاعدوا وصار عندهم أحفاد.. وما سكنوا! هلء انتوا يا اسكان المعلمين ومربي الأجيال بتفكروا حالكم روابي مثلا!! (ثكلتك بنت عمة أم الي جابت أمك) والا بتفكروا حالكم بشار المصري الي من كثر الكهرباء جاب سيارات عالكهرباء (عفكرة مالهاش خص).

بعدين بلدية اجنسنيا المسؤولة عن الاسكان حالياً وخدماته بدها تكون احسن بلدية بفلسطين يعني! مليان بلديات بتاخد رسوم وما بتعطي لا خدمات ولا بطيخ، واذا اعطت بتكون الخدمة نص كم والشارع نص كم والتخطيط فش كُم، يا عمي مدام منطقة الاسكان تابعة بالأصل للحكم المحلي، لاقولها بلدية تقدر تعطيها خدمات أو حلوها مع شركة كهرباء الشمال، (صعبة!! والله ابن صف أول بحلها).. وحِلّوها مع أجنسنيا الي بدها تفرض رسوم عالية وما عندها كهرباء توصلها للمنطقة!!

بس هو اسم الجمعية المسؤولة عن الاسكان جايبلها الدور؛ اسمها الأفق، بس ما خلولها أفق. بتعرفوش أنه بطل للاسم من صاحبه نصيب! يعني عمركم شفتوا واحد اسمه صائب وكان صائب! والا اسمه جبريل ومعناه: المُخلِص لله! –تخلص روحنا...

فش إلكم غير تعزموا حدا من المسؤولين الي بحبوا يقصوا الشريط، أي شريط! المهم يقص ويتصور. أو سموها: "روابي الشمال"، واعملوا زيارة تطبيعية (الله ينتقم منهم). وجيبوا زلمة مليان قروش يدعمكم. أو أحكيلكم: حطوا صورة لمسؤول عباب الاسكان واعملوها جدارية وهيك عالأكيد المسؤولين رح يقشعوكم! وقولوا بثينة ما قالت!

وبقلك خالصة.. تخلص روحكم... خلينا نفتح هالمزاد للي بيستحوا: بما إنه مرق عالاسكان سبع حكومات: واحد تنين تلاتة: مين وزير الحكم المحلي الي رح يطلع وجه السحارة ويخلّص هالقصة؟