رسالة من كل مواطن إلي كل مسؤل

باللهجة العامية ع لسان كل مواطن
بدى أعرف ليش ؟!!
_ بدى اعرف ليش جرة الغاز ب 65 شيكل ؟!!
بدى اشوف بنود اتفاقية شراء الغاز الي متعاقدين فيها مع مصر .
_ بدى أعرف ليش احنا بندفع حق الكهربا ، وقطر هى الي بتدفع سولار الطاقة ، من حقي أعرف وين مصاري الجباية بتروح ؟!!

_بدى أعرف ليش لما أروح ع العيادة بيدفعونى حق الدواء ، وهو جاي تبرعات من دول مانحة ، هادا الدواء جاي ع اسمى وع اسم أولادي ليش بتدفعونى حقه ؟!! و لوين بتروح فلوس جباية الأدوية ؟!!

_ بدى أعرف علي أى أساس أنت طابب ضرايب وجباية حبطرش ، والناس معهاش تشتري لقمة العيش ، بدى أعرف ليش أنت طابب رشق ومخالفات بالسواقين الغلابة ، يااخى هادا السواق ساكن بالإيجار هادا السواق امه مريضة هادا السواق بدو يرجع ب 10 شيكل لولاده يشتري خبز يمشي حاله .

_ من حقي أعرف وين المساعدات الإنسانية العينية والغذائية المساعدات المالية والنقدية ..إلخ
بدي أعرف هاي المساعدات وين بتروح ، لإنى شايف الناس بتشكي وبتبكي والكل بيحكى ما بيشوف إشئ .

_ صدقونى لو كل قرش بيدخل غزة وبيتوزع بما يرضي الله كان ما لقينا حدا محتاج ، كل دول العالم اتبرعت وبتتبرع إقنعونى وين هادى الفلوس بتروح ، والأطفال قاعدة بتبيع محارم ع المفترقات ، والنسوان مبحطة وبتتسول ع ابواب المحلات ، مش مصدقنى يامسؤل انزل من الجيب تاعك أخدك أفرجيك ، انزل افرجيك كيف طلبة الجامعات كاسحينها مشي وبنت حضرتك بتجيها سيارة طلب من المكتب الفلانى .

_ بدى أعرف إيش مصير جيل التسعينات أولاد المواطنين الغلابة ، الي الواحد فيهم لما بشوفه دمعتي بدها تنزل من عينى ، شباب زى الورد لا شغلة ولا عملة لا عندهم أفاق ولا مستقبل ، شباب زى الفل هادا أحمد امه باعت دهبها منشان تعلمه بالجامعة وهيو صافف بالدار ، و هادا شكري أبوه كان ينفسخ بشغل الطوبار ، علم ابنه وهيات ابنه حاطط كرسي وبيتشمس بالشارع ...إلخ وهناك مئات الألاف من هادي الأمثلة ، جيل التسعينات دمرتوه مرمطوه جرجرتوه ، صحيح أولاد فلان من التسعينات بشوف راكبين جيبات وأفخم شقق ، كل هادا من التبرعات الي بتيجى بإسمى وبإسم إولادى .

_ بدى أعرف ليش الي بينتحروا هم من إولاد الغلابة والي عايشين تحت خط الفقر ، أتحداكم هاتولي إبن مسؤل انتحر ، وقف هان انت وإياه أولادكم مش أحسن من اولادنا ، وقف إولادنا بدهم حياة حرة كريمة زى أولادكم بكفي ذل بكفي قهر بكفي معاناة بكفي جوع بكفي فقر بكفي حرمان ، يا بنعيش حياة زى الفل يا بنموت إحنا والكل ، مش أنتم تعيشوا وإحنا باليوم بنموت عشرين وثلاثين مرة .

_ بدى أعرف من وين للمسؤل الفلانى العقارات من شقق و أراضي وسيارات ، بدى أعرف من وين إبن القيادى فلان قاعد بيتاجر بالأراضي وبيشتري البيوت ، أي والله بعرف محاضر جامعى ساكن بالإيجار ما هو قادر يشترى نتفة شقة بدى أعرف كيف ابن فلان حصل على كل هادى الأشياء .

_ وقف انت وإياه تعال احنا اولاد الشعب بدنا نعرف كل شي ، لا تزاود علينا تسوق فيها الدين وتعمل ابوالوطنية ، احنا الشهداء احنا الجرحى احنا الأسري احنا الكادحين احنا الفلاحين احنا المسلمين إحنا أهل الدين احنا الي بتتاجروا فينا وبتلموا علينا فلوس ، منشان أولادكم يصيروا أسياد واحنا عبيد ، إولادكم مش أحسن من اولادنا .