فش دولة

السنه الماضيه مش زمان كتير كان بيقول هذه سنه قيام الدوله 
مبارح بيقول فش دوله خلال ال ١٥ سنه تحلموش ..يمكن ما سمعنا منيح فش فرق بين قيام وقيامه .طلعت سنه قيامه الدوله والقيامه بعد الموت وها هو يبشرنا موت يا حمار ،.
لماذا مر تصريح محمود عباس دون تصفيق حاد ولا دبكه ولا تسحيج الزلمه بيقول فش دوله طيب السؤال شو في انت شو ناوي ..
فكرك نعمل زي اهل الكهف ونسلخها نومه ١٥ سنه وبعدين ليش ١٥ مش ١٦ ولا ٥١ ..بتحب التقسيط يمكن ١٥ مشان الفوائد لانه كل ١٥ سنه بتصير ١٠٠% ...
خلال ال ١٥ سنه فكرك بيضل اشي اذا نتنياهو نازل يبني ويوسع ويتوسع والاستثمارات والمليارات رح تنزل عليه زي مطر هل ايام رش ...شو ممكن يضل ..
خطر في بالي ممكن قاعدين بيبنوا مشان يسكنونا فيها ...يعني خلال ١٥ سنه بنوخذها مفروشه بنصير اكتر منهم وبنعمل انتخابات وبنسيطر عل كنيست وبنسميها اسرائيل الفلسطنيه ...
اي خاخام من جماعتك حكالك هل حكي ما بتعرف انهم نصايين مخادعين جننوا سيدنا موسي بدهم يضحكوا علي لحيتك .. 
اه صحيح ملكش لحيه ومعندكش لحيه ممشطه بس مع حماس . 
كل ما طفرت بتدور في الدفاتر القديمه كل ما فشلت بتروح تبحبش لتلاقي حدا تلزقها فيه ...هل مره حطها في لحيه ابو عمار هلكنا وهو يقول علي مرمي حجر والطفل والزهره كبروا وتحوزوا ولا علم ارتفع ولا دوله صارت ...هيك بتكون ملكش ذنب كلها من ورا ابو عمار وهي انت اليوم بتقول فش دوله ...ربنا ولك الحمد ...طيب هل مسخمين في السجون والمعتقلات شو بدهم يناموا ..صائب شو بده يشتغل وهل مكاتب والابهه والمقاطعه شو رايك تعملها فندق ٥ نجوم وطارق بيزبطها مهي شغلته الفنادق ألخمس نجوم ...
السلطه اعملها شركه سياحه وجيب سياح وبتبيع صدف وخرز وخشب ...لشو الدوله وهم البال ...
المشكله ولا واحد حكالك شو بتحكي ...يمكن مع البرد كل واحد لف حاله ببطانيه ونام فش معك غير الهباش الذي وعد.بالصلاه في غزه بدل القدس ...بتعرف غزه اهم قدس شو ...الهدف تحول خلال ال ١٥ سنه الي تحرير غزه من حماس سيبك من القدس بلا قدس بلا بطيخ ...اسقاط حماس اولي واهم وفرض عين تسقط تسقط تسقط ..تسقط وبس #