تاريخ النشر: 2018-10-28 | 11:50
تاريخ النشر: 2018-10-28 | 11:50
( قصيدة بالعامية المصرية )
د. عبد القادر فارس
قالوا العقلِ زينة ,,
وهَبها الرب للإنسان
عشان يِكَمِلهُ بين خلقه
وقالو اللي بِيراقِب الناس
حَيموت يوم بِهَمُه
وقالوا الغِيرة للنسوان
طيب ليه الرِجَالة
بِتْغير هِيَ كمان
قلنا من الحسد ,,
أصلِ الكِيد والحَسد
إِتْذكَر بَرضُه في القرآن
حتى رسُولنا النبي إِتْحَسد
من كَمالهُ وأخلاقُه وجَمالُه
من العدو ومِن القريب
لكن الحاسد دايماً يِخِيب !!
***
وقالوا إنْ الطُوبَة ,,
إللي ما تْصِيب تِعَوَر
واللي بيته من قَزاز
ما يِرميش الناس بالحَجَر
وقالو الكلمة بِتِجرَح
ولما من اللسان بِتِطلَع
أمضَى من السِيف
واقْسَى من الصًخِر
وقالوا لسانك حصانك
إن صُنتهُ صانَك
وان هِنتهُ هانَك
طَيبْ ليه يا إنسان
بِتِئذي غِيرك بِلْسانَك ؟!
***
وقالوا حَرِّص مِن عَدوك
وخلِّي بالَك مِن صاحبَك
أصلهُ مُمكن كَمان يِلدَغَك
يِمكِن يِمْسِكْلَك عَ الغَلط
قُلتِ صاحبي وحبيبي ,,
أسامحُهُ وابلعلُهُ الزَلط
أصلِ مُش مُمكِن ياخُويا
في يوم صاحب يِخونَك
لأنهُ قالوا في الأمثال :
مُمكِن يِكون لَك أَخُو
ما وِلِدُتهُوش أُمَك
لكن نِعمِل إيه يا بِيك
هِيِ الدِنيا كِدِه ..
يوم لِيك ويوم عَليك !!
جميع الحقوق محفوظة لـ أمد للاعلام © 2007 - 2026
