بالفلسطيني المشربح روح زمّر يا زامير  ما كان غيرك اشطر

يا جماعة الخير باين إنّه هذا زامير، قائد جيش الاحتلال الجديد، نازل عالساحة مثل "فلّاح ونازل مدينة"، مع إنّه جنرال في الاحتياط،  

يعني بيركض ركض وبِدّو يعمل العمايل، يعني بِدّه يبوبرها!!!، وفي يومين بدّه يعمل يلّي ما قدرو يعملوه في سنتين،

يا جماعة الخير، انتم بتعرفوا إنّه هذا الزاميرجابوه من الاحتياط، على قد مقاس ايد نتنياهو، لانه الجنرال  هاليفي، القائد  السابق كان يناقف نتنياهو وما يسكتلُه،

جاي زامير وخطة احتلال قطاع غزة تحت إبطه، وبينقل في فرق الجيش من جبهة الشمال على غزة منشان يحتلّها كلّها وييكسر الدنيا هناك وييسحب الرهائن الاسرائيليليين مثل الشعرات من العجين،

طيب ياعمّي ما كان غيرك اشطر، زميلك والقائد السابق هيرتسي هاليفي وفوقة وزير الحرب يوآف غالانت حاولو واحتلّو وقتلو ودمّرو، وشو كانت النتيجة؟؟؟، ولا قدرو ياخذو اسير واحد بالقوّة من المقاومة، وتكبّدو خسائر خير الله بالجنود والمعدّات،

يعني هلّا شو عدا ما بدا انه زامير جاي حازب وبدّه يعمل يلّي ما قدرو يعملوه قبله،

يبدو يا جماعة الله والعليم الله والعليم انّه المقاومة كامنه وساكته والله بيعلم شو التكتيك يلّي راح تمشي عليه، وشو راح يصير مع زامير وقيادته لمّا طيارات الهليوكبتر تصير رايحة جاية على قطاع غزة تنقل الجرحى والقتلى زي ما كان بيصير قبل وقف اطلاق النار،

وبعدين يا جنرال زامير جماعتك في تل ابيب داقين في بعض، نتنياهو مع رونين بار ومع المستشارة القضائية للحكومة، ومهمّش فاضيين لغزو كبير في قطاع غزة، غارة من هون أه، واغتيال من هون آه، وقصف مستشقى من هون آه، لكن احتلال كامل وحكم عسكري للقطاع يبدو انها مش سهله، مع إنه هذه رغبة بن غفير وسموتريتش،

لكن يا زامير والحالة هذه روق شوي وروح زمّرلك شوي.