بالفلسطيني المشربح شو إلّي بِدّه إيّاه نتنياهو

يا جماعة الخير الله يمسيكم بالخير في هالرمضان الفضيل، قبل ما نبدا نحكي كلام من فوق الزنّار وكلام من تحت الزنّار،

هذا نتنياهو عامل مثل الثور الهائج، بينطح في كل الاتجاهات، وحاسب حاله ما حدا قادر يردُّه،

"داقق" في جماعته، العسكريين الامنيين، وبدّه يلبّسهم "اخفاق السابع من اوكتوبر، أو الكف يلّي اكلوه وما زالوا بيلفّوا حوالين انفسهم،

داقق في جماعته من الشاباك، واحنا مالنا،"فُخّار يكسّر بعضه"،

وبتعرفوا مين بيناصره على الشاباك والجيش، واحد من فصيلته ونوعه  ابن غفير الغشيم المتطرف يلي بيفهم بالعسكرية مثل ما بيعرفوا معظم الناس بالفلك وعلم النجوم،

وعلى البيعة بيناصره وزير ماليته، ضلع المثلث الثالث سموتريتش إلّى ما بينام الليل لانه بدّه جيشهم يكتسح غزة ولبنان، وكأنه جيش الاحتلال كان يصيّف ويصيّد سمك على شط البحر، وما كان مكتسح قطاع غزّة وجنوب لبنا، واكل هوا في الجنوبين، ولما اجتمع عليه جنوب الجنوب من باب المندب، صاروا يندبوا، ويركضوا على الملاجئ اكثر ما يركضوا على الجامعات والسوبرماركيتات،

نتنياهو يا جماعة الخير، مع انه بيحب يطرح حاله ابو العُرّيف في الامن والعسكر، إلا انه غشيم، لانه معروف انه لا يأتي من صفوف الجنرالات، وكل ما عنده انّه بيعيش على امجاد اخوه يوني الذي قتل في عملية عنتيبي في اوغندا عام 1976،

وكمان بيقولو انه شارك في عملية كوماندوز ضد مختطفي طائرة في مطار اللد وجُرح فيها حسب الروايات،

عشان هيك هوّ ما بيتطاوق مع الجنرالات، واقال الجنرال يوآف غالانت من وزارة الجيش وعيّن مكانه سياسي غشيم مثله جدعون ساعر، إلّي نازل تصريحات وتهديدات بالشوالات!!!،

كما ظل يصادم وداير ورا هيرتسي هاليفي رئيس الاركان حتى استقال، وغيره وغيرهم، استقالوا او في طريقهم للاستقاله، وكلّه عشان نتنياهو يحفظ دقنه وييطلّع كل من حواليه شريك في اخفاق عبور اوكتوبر ما عداه، هوّ نظيف مثل البفت من هالطوشة،

امّا على مستوى وقف اطلاق النار في غزة ولبنان فهوّا عامل مثل حيّة التبن، بيلبد وببان فجأة وبيلسع،

بدّه الرهائن يرجعوا مجّانا، هيك عينك عينك بدون ما يروح على المرحلة الثانية ولا الثالثة من الاتفاق المتفق عليه،  وكانّه اصبح لديه حساسيّة من الارقام، بده مرحله اولى وبس، وكل يوم بيطلع بفن جديد، تمديد، او مطمطة،

وهوّ بيعتقد انّه ترامب معاه ومناصره على الحلوه والمُرّه،، لكن ترامب اشطر منّه وعارف شو بدّه، وبينظر لبعيد،

نتنياهو كل ما بدّه انّه يظل رئيس وزراء حتى يحمي حاله شويّة من تهم ومحاكمات الفساد، وحاطط على يمينه وعلى يسارة بن غفير وسموتريتش، إلّي الله اعلم،  الله اعلم رايحين يخربّوا اسرائيل داخليا وخارجيّا،

بيحاولو يعملو في الضفة يلّي عملوه في غزة، قتل ودمار وتهجير،

لكن شعبنا صامد، وبيلملم جراحه كل يوم، وغزّة صامده، وجنوب لبنان صامد واليمن صامد، حتى بعض العرب يلّي كانو بعاد صار عندهم موقف لانهم عرفوا وتأكدو انّه نتنياهو ما بيحترم حدا وما حدا منهم عنده حصانه حتى لو اشعل اصابعه شموع لنتنياهو ومن ورائه ترامب،

بالنهاية يا جماعة الخير، نتنياهو يتعامل بعقلية المستعمر، عقلية الحرامي إلّي سرق الارض وعارف انها مش إلُه،

نتنياهو انكشف امام العالم، وانكشف امام جمهوره، وحتى لو استمر ينطح في كل الاتجاهات فانه ليس اللاعب الوحيد في الحلبة، والدنيا بتتغيّر، ودايما "بيدوب الثلج وبيبان المرج".