بالفلسطيني المشربح عن ترامب وهياجه وهمجيّته وهجومه

ولك يا عمي، يعني كل إلّي بشتغلُه هذا الاهوج ترامب، كُلّه كُلّه مدروس ومزبّط وفي قفاه خطّة مدروسة ومتعوب عليها، مع إنّه بيبيّن واحد مهوّي ومجنون وسايقها بالهبل والمداهنة، وجاي يبيع الميّة بحارة السقّايين!!،

ولك ياعمّي اسرائيل دمّرت قطاع غزة، وقتلت وشرّدت واعتقلت واجرمت وعملت إلّي ما بنعمل وما بنعمل في غزة واهلها، يعني جرائم حرب وابادة جماعية، ونتنياهو مُعلن رسمي الآن مجرم حرب ومعاه شهادة تثبت هالكلام
طيّب هلّأّ  يا جماعة الخير، جاي هذا ترامب، ابليس الارض، تاجر البندقية، لعيّب الثلاث ورقات، جاي يتخوّث علينا، جاي ينظّف ايدين الصهاينة وايدين صاحبه نتنياهو من دماء غزة، هيك عينك عينك، وعلى عينك يا تا جر، وكأن راس مالها بوسه لحية او شرب فنجان قهوة، ويا دار ما دخلك شر!!،

ولك يا عمّي كيف ما دخلك شر، ما ترامب هوّ الشر ونتنياهو امرّ من المُر،ولاثنين مجرمين من هون لآخر الدنيا والعُمُر وجُرّ،

إجا ترامب، وإطلّع على قطاع غزة وقال يا حرام: "ما بنعاش فيه، ما فيش ميّه سُخنه، ولا فيه دوشّات ولا فيه لا همبرغر ولا هوت دوغ، بدنا ننقل سكان قطاع غزّة لمكان افضل، مكان ما يقتلوهم الاسرائيلية فيه، ويسكنوا ويوكلوا ويشربو ويناموا منيح، ويشخروا كمان، ضروري يشخروا، وإذا ما شخّروا بننقلهم على مكان ثاني يشخروا فيه، اهم شيء انهم يشخروا،

وعالهوّارة الهوّارة وشخّر يابو الهوّارة، بنبنيلك بيت جديد، وبنطعمك من لحم القدّيد، وبتعيش من أوّل وجديد، وبنهديك كل يوم إسواره، وهوّر يابو الهوّارة، وبدل الركام بنهديك عمارة وبتعيش مُعزّز مُكرّم وكأنك أمير في امارة،

لكن يا جماعة الخير هذا ترامب لا بيعرف ولا بيفهم شو معنى إنّه الواحد حابب يبقى في بلدُه، متمترس في بلده، يقعد على ذرّات الرمل إلّي مشى عليها حافي وهوّ صغير، وفرفر عليها وعملها عليها هالثقيل،

وهسّا بيعرفها رملة رملة وبيدافع عنها وهوّ لابس شبشب،

يفهم ترامب ولّا ما يفهم، من هل المراح ما في مراح ولا رواح، متمترسين في غزة يعني متمترسين، ورمالها عنا احسن من منهاتن، ولا ريفييرا ولا ترامبيرا، غزاويرا غزاويرا،

وهوّر يابو الهوّارة، غزّتنا بألف امارة، وراح نحوّل الركام إلى ميت عمارة.