فؤاد يعاتب هنيدي: اتقي الله وراعي العيش والملح

وجه الفنان محمد فؤاد، رسالة عتاب مباشرة إلى النجم الكوميدي محمد هنيدي، بعد تداول تصريحات للأخير حول شعور فؤاد بالغيرة منه بعد نجاحه في فيلمهما الشهير "إسماعيلية رايح جاي"، وأكد فؤاد أنه وراء نجاح هنيدي، وفرح به لأنه جزء من نجاح العمل.

وقال"فؤاد"، خلال حواره مع الإعلامية بسمة وهبة، إيه الجو المسمم ده. بقى يطلع منك الكلام دا يا هنيدي. يا راجل راعي العيش والملح وتعبي معاك في الفيلم. دا أنا اللي خليتك تلتزم، وفلوسي حتى الآن ما أخدتهاش من فيلم إسماعيلية رايح جاي، وكنت بصرف على المنتجين اللي فلسوا.

وتابع محمد فؤاد: أنا أغير منك يا هنيدي عيب. اتقي الله.. هو أنا جايبك معايا الفيلم عشان تفشل. بحبك يا هنيدي وقسماً بالله معرفش أغير منك.

وأردف محمد فؤاد: عبد الحليم حافظ كان أهم عنصر في فيلمه هو عبد السلام النابلسي. راعي يا هنيدي تعبي معاك في فيلم إسماعيلية رايح جاي. ده أنا كنت بصحيك عشان تيجي تصور. والفيلم ده أنا دافع فيه 500 ألف جنيه.

وأضاف محمد فؤاد: أنا مش بغير من حد ومفيش حد أغير منه. أنا كرهت فيلم إسماعيلية رايح جاي عشان لاقيت في حروب نجوم. أنا اللي قايل لـ هنيدي يضحك الناس إزاي في الفيلم.

كما تحدث الفنان محمد فؤاد عن عملية تكميم المعدة التي خضع لها مؤخراً، قائلاً: ليه الناس بتخبي إنها بتعمل عمليات تكميم.. وعمري ما دخلت غرفة العمليات وخايف عشان سلمت أمري لله. ومقولتش لأولادي أني هعمل العملية.

وعن حلقته في برنامج رامز نيفر إند، الذي يقدمه الفنان رامز جلال، أضاف: معرفش إنه هيتعمل فيا كده في مقلب رامز. الفخ بيكون مرسوم أن الضيف مش عارف المقلب. وأي حد يقول أنه مش عارف رايح لـرامز بيمثل..هما كانوا عارفين أني عامل عملية.. ودراعي كان هيتكسر.