محمد فراج يرد على استياء الجمهور من تصريحاته عن "داليا شوقي"

رد النجم محمد فراج على استياء الجمهور من تصريحاته للدفاع عن الفنانة الشابة داليا شوقي بعد موجة الانتقادات التي تعرضت لها بسبب مشهد في مسلسل "سفاح الجيزة".

وأصدر محمد فراج بيانا جاء به: "بعد مساء الفل، فوجئت بعدد كبير من أصدقائي بيقولوا لي (مزعل الجمهور ليه يا فراج)، بصراحة استغربت من السؤال، أنا بقالي 15 سنة ممثل عمر ما حصل إن اتقال عني جملة زي دي".

وتابع: القصة باختصار، أنا كنت في العرض الخاص لفيلمي، واتسألت من برنامج محترم عن ردي على إشاعة انفصالي عن بسنت وانتقاد أداء داليا شوقي، ورغم أن لا الوقت ولا المكان يستحملوا الكلام دا لأننا بنحتفل بالفيلم، لكن احتراما للإعلام بشكل عام جاوبت، بس زي ما كلكم عارفين أن صيغة السؤال بتتحذف في المونتاج، والخبر اللي بينتشر هو الإجابة فقط لا غير.

وأضاف: السؤال كان "إيه ردي على حملات الإهانة والتجريح"، فأنا قولت إن ده ماينفعش ناخده بجدية، لكن ماكنتش بتكلم على الجمهور بشكل عام إطلاقا، أنا متأكد إن جمهوري اللي بنى اسم محمد فراج فاهم معنى كلامي كويس، وعارف إن فيه فرق بين الرأي حتى لو سلبي، وبين الشتيمة، فيه فرق بين وجهة النظر والتجريح، ومتأكد كمان أن جمهوري عارف أن مستحيل أحجر على رأيه.

واستكمل: ياريت دايما الحكم على أي موقف أو رأي يكون بنظرة شاملة مش من خلال سطرين متاخدين من مانشيت على فيسبوك أو من فيديو اتعمل له مونتاج.

واختتم كاتبا: معلش طولت عليكم، بس ممكن اللي حصل دا فرصة لتأكيد امتناني الدائم بأراء الجمهور، وإني بستفيد من النقد والملاحظات زي ما ببقى سعيد بالإشادات، بحبكم وشكرا على دعمكم ليا من بداية مشواري.